Azərbaycan Respublikası Ərazilərinin Minalardan Təmizlənməsi üzrə Milli Agentlik

İsveçrə Konfederasiyasının Türkiyə Respublikasındakı hərbi attaşesi polkovnik leytenant Mişel Rosserin ANAMA-ya səfəri

11-13 iyun 2013-cü il tarixlərində İsveçrə Konfederasiyasının Türkiyə Respublikasındakı hərbi attaşesi polkovnik leytenant Mişel Rosser ANAMA-ya səfər etmişdir. Səfər zamanı o, ANAMA-nın Füzuli, Göygöl bazaları ilə, eləcə də Tərtər rayonunda aparılan əməliyyatlarla tanış olmuş və ona Təlim, Tədqiqat və Keyfiyyətə Təminat (TTKT) Qurumu rəhbəri tərəfindən Agentliyin fəaliyyəti ilə bağlı prezintasiya təqdim edilmişdir.

Səfərin məqsədi ANAMA-nın fəaliyyəti ilə yaxından tanış olmaq habelə İsveçrə tərəfindən pay edilmiş mina və partlamamış hərbi sursat (PHS) zərərsizləşdirilməsi üçün nəzərdə tutulmuş SM-EOD sisteminin monitorinqini aparmaq idi.

13 iyun 2013-cü il tarixdə polkovnik leytenant Rosser ANAMA baş ofisində Agentliyin Direktoru Nazim İsmayılovla ikitərəfli görüşdə iştirak etmişdir. Görüş zamanı minatəmizləmə fəaliyyəti sahəsində yeniliklər, həyata keçiriləcək gələcək planlar və əlavə SM-EOD sistemlərinin alınması barədə müzakirələr aparılmışdır.