Azərbaycan Respublikası Ərazilərinin Minalardan Təmizlənməsi üzrə Milli Agentlik

ANAMA-nın Təcili və Təxirəsalınmaz Təmizləmə Əməliyyatları barədə ümumi məlumat

2020-ci il 27 Sentyabr tarixində səhər saatlarında Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən qoşunlarımızın bütün cəbhəboyu əks-hücum əməliyyatı başlaması barədə qərar verilmişdir.

  

Azərbaycan silahlı qüvvələri yalnız əks-hücum əməliyyatları apararkən, Ermənistan tərəfi yaşayış yerləri, səhiyyə və təhsil müəssisələri, əkin sahələri və təsərrüfatlar daxil olmaqla mülki insanları və obyektləri hədəfə alır. ANAMA öz meyarlarına uyğun olaraq yalnız mülki əhalinin yaşadığı və hərbi artilleriya atəşinə tutulmayan ərazilərdə fəaliyyət göstərir. Ermənistan silahlı qüvvələri tərəfindən artilleriya atəşinə məruz qalan ərazilərdə (Ağdam, Ağdaş, Ağcabədi, Bərdə, Beyləqan, Biləsuvar, Cəbrayıl, Goranboy, Naftalan, Kürdəmir, Füzuli, Tərtər, Tovuz, Şəmkir, Hacıqabul, Zərdab, Xızı, Oğuz, Qəbələ rayonları, Gəncə və Mingəçevir şəhərləri) ANAMA lazımi təcili və təxirəsalınmaz əməliyyatları yerinə yetirmək üçün xüsusi qruplar yerləşdirmişdir.

  

2020-ci il 27 sentyabr tarixindən etibarən Agentlik tərəfindən cəbhə boyu ərazilərə operativ və təxirəsalınmaz əməliyyat çıxışlarını həyata keçirmək məqsədilə 17 xüsusi çevik mobil əməliyyat qrupları yerləşdirilib. İndiyədək, Azərbaycan Respublikası Daxili İşlər Nazirliyinin (DİN) "102" Xidməti-Zəng Mərkəzi, Azərbaycan Respublikasının Fövqəladə Hallar Nazirliyinin (FHN) "112" Böhran Vəziyyətlərində İdarəetmə Mərkəzindən daxil olan müraciətlərə əsasən ANAMA tərəfindən 687 operativ və təxirəsalınmaz əməliyyat çıxışı, 282 ədəd partlamamış hərbi sursat (PHS), 1 144 ədəd 9N235 bombacıqları, 1 180 ədəd müxtəlif çaplı patronlar, 1 ədəd qaz qumbarası, 14 ədəd hərbi məqsədlər üçün istifadə olunan meteoroloji radiopelenqator, 6 ədəd dron (zərərsizləşdirilmişdir), 2 ədəd raketin mikrosxemi və 401 ədəd partlamış raket hissələri aşkar olunmuşdur.

  

Mövcud hərbi vəziyyətlə əlaqədar, cəbhə xəttində Ermənistan silahlı qüvvələri tərəfindən atılan bəzi döyüş sursatları partlamır, şəhər və rayon mərkəzlərinə düşərək həm infrastruktur, həm də yerli əhali üçün çox ciddi təhlükə yaradır.Təhlükənin qarşısını almaq üçün Agentliyin mütəxəssisləri yerində zərərsizləşdirmə əməliyyatları da həyata keçirirlər.

  

Hal-hazırda Agentliyin heyəti cəbhə bölgələrində infrastruktur, strateji obyektlər və yerli əhalinin təhlükəsizliyini təmin etmək üçün 24 saat fasiləsiz fəaliyyət göstərir.

  

Bununla yanaşı, yuxarıda adları qeyd olunan şəhər, rayon və onlara daxil olan kəndlərdə Agentlikdə təşkil olunan qruplar tərəfindən sakinlərə yerlərdə təhlükəsiz hərəkət qaydaları, Mina Təhlükəsinə dair Maarifləndirmə və xəbərdarlıq istiqamətində tədliğat fəaliyyəti həyata keçirilir.